郭富城滄桑Look拍戲 當街摷垃圾桶

郭富城（城城）自從結婚生女後，事業上繼續搏殺，工作未有清閒過，除準備今年100場世界巡迴演唱會外，又馬不停蹄密密拍戲，一年拍足4、5部電影，陪屋企人的時間自然少了。不過，城嫂Moka都好識搵節目，自娛消磨時間，湊女之餘，閒時就相約朋友去逛街、high tea，甚至坐遊艇出海玩，認真寫意。

《東周刊》直擊城城早前在旺角街頭為新戲拍外景，不過他開工就冇老婆生活咁歎，見飾演借宿快餐店做「難民」的他留鬚，一身衫褲皺掹掹又邋遢，企街食煙扮滄桑。後來城城走去旁邊的垃圾桶摷垃圾，在垃圾袋執到一對波鞋。這場戲看似簡單，其實當日天王出巡，落區在旺角拍戲，引來不少途人圍觀，包括來自內地的自由行同胞，甚至南亞人士，場面極之墟冚。城城在眾目睽睽下投入演戲，亦有勞工作大員在場維持秩序。難怪一嗌cut機拍完場戲，城城即9秒9閃返上保母車，以免引起混亂。