維港會：立會煞科兩派高歌《友誼萬歲》 午間音樂會曾氏兄弟來趁高興

立法會本年度大會已完結，議員好快可以「放暑假」，立法會秘書處為了讓大家鬆一鬆，昨日分別安排午間音樂會同茶敍，供議員、學生及秘書處職員交流，又齊齊演奏、唱歌，場面好熱鬧。

打頭陣的午間音樂會，場面相當盛大，泛民和建制議員更「行埋一齊」。經民聯主席盧偉國表演拿手的色士風，同青年音樂訓練基金的中樂團中西合璧一齊合奏歌曲《江河水》。他隨後又與公民黨陳淑莊、新民主同盟范國威和秘書長陳維安四人齊齊合唱關正傑的名曲《萬水千山縱橫》，陳淑莊唱得非常豪氣，還有教育界葉建源、醫學界陳沛然打鼓伴奏。

今次音樂會仲有壓軸表演嘉賓，前主席曾鈺成及其弟前民政事務局局長曾德成亦畀趁高興，二人與全體學生及出席議員齊齊合唱蘇格蘭民謠《Auld Lang Syne》（友誼萬歲）。Kelly見到此情此景，都衷心希望來年立法會可以大家少啲爭拗。

秘書處之後再搞多個茶敍，慰勞大家。梁君彥致辭時笑言：「雖然九成幾嘅職員都唔知叫咩名，但衷心感謝大家在背後做咗咁多嘢。」葉建源就爆料，話今次茶敍自己可以深入神秘禁地，就係立法會廚房。原來宴會廳旁邊有一個小廚房，入面五臟俱存，有職工仲捉住佢開心影相。