孖KB拍節目玩轉泰國 Cheronna扮人妖自愧不如

組合Super Girls成員吳嘉熙（Cheronna）與李健宏（KB），拍攝旅遊節目《玩X爆泰國》。KB繼續發揮喪玩本色，走訪多個泰國地方「搞搞震」，難怪Cheronna直言今次泰國之旅勁好玩，她表示︰「今次泰國之旅係齋玩，將好玩嘅嘢分享畀大家，我哋全程都係玩同埋做啲好傻好白癡嘅嘢，出到來嘅感覺係好好笑，想話畀人知去泰國唔止可以shopping同做spa，係可以玩埋呢啲嘢。」

其中KB與Cheronna於當地欣賞人妖騷後，興之所至，二人索性踩入「人妖學校」學做人妖，見二人先與當地人妖近距離接觸，最後更要「變裝」做騷。Cheronna謂︰「我哋睇完表演後，就要去學校，著佢哋啲衫跟住模仿個騷表演唱跳。我以前見過人妖表演，但今次係去佢哋間學校睇佢哋台上表演，特別去學如何妸娜多姿。」

Cheronna大讚人妖舉手投足都靚到爆，自言麻甩的她自愧不如，「近距離見佢哋，覺得仲靚過女人，我作為女人覺得自己好麻甩，反而佢哋食嘢斯文，一啲小動作都靚過好多女人。」變裝後，Cheronna即時向男友黃奕晨開心share，不過男友似乎鍾情KB的造型，她又讚KB有做人妖潛質︰「KB化到好好笑，其實佢好有潛質做人妖，因為佢好有表演慾，只係佢個樣唔夠女人，始終有點男人味道 ，所以可能要去整容。」