【挺肚開工】鍾嘉欣直播傾偈 笑腹中B仔踢肚夠活躍

懷孕近8個月的鍾嘉欣正在溫哥華待產，早前開心宣佈佗B仔，湊夠好字。安胎不忘慰藉粉絲的鍾嘉欣，今日突然在面書玩直播，同大家傾偈。化晒妝Set好頭的鍾嘉欣稱今日在溫哥華出席珠寶活動，難得可以扮靚開工，又嘆孕肚大得好快，手腳依然纖瘦、體重增加不少。

鍾嘉欣分享近況：「呢胎同佗大女Kelly一樣，佗得好低、肚好尖，每一日都好似好重，呢胎暫時touch wood還可以啦。同埋BB頂到內臟擠埋一齊，有呼吸困難、食嘢又快飽。」她講到腹中B仔好活躍，瞓覺時BB又搲又踢，令她醒來，又自言愛落手做家務及照顧囡囡，指家事令她很忙碌。

心繫TVB的鍾嘉欣身在加國都有煲劇，讚《宮心計2深宮計》及新劇《BB來了》好睇，撐男女主角黎諾懿、李佳芯。另外，去年劇集《再創世紀》到溫哥華取景，鍾嘉欣因利乘便有份演出，她期待劇集播映，畢竟很久沒作品出街。