黃心穎 愛不能等 與馬明一劇情更深

黃心穎於無綫劇集《宮心計2深宮計》中飾演甘若芊，劇中跟馬國明（飾任三恕）一段龍武軍將軍跟司設房女史的感情綫，這一對情侶由戲外到戲內都是觀眾焦點。黃心穎坦言，透過《宮》劇，他們經歷了同一個臉孔度過了另一個不圓滿的人生，確實令到他們更珍惜對方。

撰文∣駱震寧

黃心穎入行六年，曾拍攝多部劇集，《宮心計2深宮計》是她第一次接拍宮廷劇。談到兒時可有無幻想拍宮廷劇，心穎說：「真係有啊！好記得睇第一輯《宮心計》，以前細個在溫哥華無嘢做成日追劇，亦鍾意睇古裝劇。當然會幻想有無機會做呢，但係當時又唔想做演員喎。」談到拍攝完成後感覺如何？她說：「其實有份參與，已經覺得好得意、好奇妙，自己細個睇那套劇，而家竟有份拍續集。拍完個感覺是原來咁辛苦，哈哈！但是辛苦都值得。」心穎坦言背台詞確實有點困難，因為自己中文算不上很好。她說：「雖然好辛苦，但見到拍出嚟的效果很靚，再加上自己好鍾意這個角色，所有嘢對我嚟講都好值得。」

最深刻的喊戲

談到劇中難忘戲分，心穎興奮地說：「好多呀！因為甘若芊這個角色，是我其中一個最鍾意的角色，對我而言挑戰好大。雖然個角色都是開開心心、傻傻更更，同我之前角色有點似，但她的成長過程起伏好大。我之前角色都無乜感情綫，但今次感情綫對若芊是最重要，所以好多場都好深刻。」談到哪一幕最深刻，心穎提到當中有一場重要的喊戲，她需要背讀冗長對白，雖然拍攝完成但對自己表現卻不太滿意。她說：「但後尾因為服裝問題要重拍，導演問我有無信心一個鐘內拍到，我真係有啲驚，因為第一次用咗四、五個鐘拍，但自己又好想再做好佢，所以把握這個機會。再加上，已經拍完三個月，自己對若芊更加了解，拍出嚟好好多，終於明白點解對白會感動到若芊。」

愛不能錯過

劇中馬國明（飾任三恕）跟黃心穎（飾甘若芊）一對亦是焦點，他們的感情綫淒美揪心。談到拍攝時心穎跟馬明已相戀一段時間，本為情侶拍攝時會否更得心應手？心穎笑說：「好多人都咁問，哈哈！我會覺得係難咗，因為劇中發生同現實係唔同嘅時候，要同一個臉孔想像另一個故事、另一個經歷喎！但好彩馬國明係一個好好嘅演員同對手，佢好認真帶我入戲，佢會好認真咁交對白，會交足晒佢嗰邊嘅戲，縱然鏡頭唔係拍緊佢，佢一樣做足一切。」笑問到拍攝接吻戲分時，會否不知不覺更投入。她笑說：「黐綫！哈哈！唔會㗎！當你拍得多接吻戲就會無感覺，邊會cut唔到機，點會㗎！」

黃心穎跟馬國明於另一個「人生」經歷了一段淒美愛情，會否令到現實中的愛情觀有所改變和影響，諸如更加珍惜對方？心穎說：「係有少少！我睇劇中感情綫，好多嘢係timing，原來好多嘢就係錯過咗就會無咗，有好多好可惜好可惜嘅時候。唔單止感情，會令到你明白好多嘢係唔可以等太多。」談到《深》會否是他們感情的催化劑？她笑笑說：「都有嘅，都有嘅！我諗你問佢（馬國明）都有嘅。」心穎認同他們透過《宮》劇，經歷了同一個臉孔另一個不圓滿人生，確實令到他們更珍惜對方。

結婚變得近咗

談到終身大事，心穎笑笑說：「如果早一、兩年問我，我會覺得結婚真係好遙遠。但原來這段時間已經做咗好多唔同嘅嘢，或者身邊的人都開始結婚，現在會真係開始諗，會覺得近咗，機會率係高咗，但我唔會係呢幾年嘅事。」問到可有機會閃婚？她笑說：「我又唔知喎！但我又唔抗拒嘅，只不過唔知我會唔會咁衝動，不過都應該唔會嘅。」

另外，黃心穎坦言入行六年的確是令到自己急速成長，但於聚光燈下飽受抨擊，亦的確令她有點難以適應。心穎提到早前楚原導演，於「第37屆香港電影金像」獲得「終身成就獎」的一席話，她說：「我今年都29歲，但我回望自己嘅2字頭，係可以話畀自己聽，我令到自己個人生好精采。可能我未係好成功，起碼我無浪費咗時間。」