何遠恆蒲頭撐基仔 遭古仔取笑「同個咩彩華散咗」

古巨基紅館騷昨晚請來四虎任嘉賓，並重拍當年新五虎合照後，基仔就落台換衫，留低四虎在台上吹水，大講對基仔印象。古仔說 : 「基仔好飲得。好識做蛋糕…整餅。好跌得囉，咁都可以繼續撐落去，好嘢！」何遠恆話基仔是一個好男人，古仔即嘲對方，說：「咁你即係冇講嘢啦，我最近睇新聞，你同個咩彩華散咗…係咪嗰晚我哋約食飯你冇出現，去咗滾所以散呀？」何遠恆即刻耍手擰頭，說：「唔好講呢啲啦。」劉愷威則謂：「基仔成日好濕，總之好濕啦！」搞到觀眾又狂笑。
不過最令觀眾興奮，是四虎問觀眾想聽甚麼歌？觀眾大叫《男朋友》、《今期流行》等古仔的歌名，現場即響起《今期流行》的音樂，古仔聽到之後即指著控制台監制錢國偉的位置，說：「肥仔，你唔係真係玩嘢呀？」何遠恆、吳家樂已經隨著音樂大跳古仔當年的拜神舞，令觀眾笑聲歡呼聲四起，不過古仔就求大家放他一馬，說：「唱歌可以唱，但舞就唔好迫我跳啦！我拜神拜咗咁多年，唔好搞我啦！」之後基仔出來，與四虎一齊唱住《我愛毛查查》並跟觀眾握手，全場氣氛極其高漲。