【宅急變】粉紅屋嚇窒男屋主 獨居女唔願斷捨離同Ann姐互寸

美容達人陳莉敏（Queenie）撈過界幫人粉飾蝸居，同節目編導岑應合作新節目《蝸居宅急變》，與一班改造達人，為參加者的屋企大變身，條件是戶主要完全接受專家提供的方案，甚至接受殘酷批評。Queenie與團隊主張「斷捨離」，要參加者狠心扔掉多餘雜物騰出空間、上淘寶買價廉物美的家品、廢物利用、精明收納等。

Queenie與改造達人Ann姐在首集為姜氏夫婦、單親母親Helen與三子女重新裝修分別是300呎及400呎的蝸居，戶主齊大呼遵從斷捨離法則好困難。令人大開眼界的有400餘呎的「包膠」私人樓單位，屋主Kay與「疑似強逼症」的表姨同住，家中的電視機、電飯煲等全鋪上膠袋防塵，屋企有一大個「膠袋山」。團隊為Kay家居完美收納，一個月後再探訪，見表姨又忍不住為屋企包膠防塵。

來到獨居女Jencil的家，Queenie及Ann姐出手實行「斷捨離」，怎料Jencil後悔要丟棄物品，更與Ann姐有爭拗，堅持家中的物品都有用，Ann姐指Jencil太極端及完全不想清雜物，並寸爆說：「有時最冇用嘅係自己」。Jencil則嘴藐藐道：「啲嘢唔係佢哋嘅，針拮到肉先知痛」。旁白馬家豪亦不屑地反擊Jencil：「但係呀小姐呀，當初你答應我哋肯清理同掉嘢，我哋先畀你參加節目。」最後Jencil都認輸，任團隊裝修屋企。

昨晚播出的一集，人妻Wing嫌奶奶贈送的新婚居所裝修老土，多得Queenie幫手裝修成「烈焰紅唇粉紅博物館」，上淘寶買粉紅浮誇家品，地氈、窗簾、檯燈、茶几通通都是粉紅色，令Wing老公返到屋企嚇到眼都凸。