哥哥香港長大識少少廣東話 黃秋生：去澳洲同家人BBQ

黃秋生在單親家庭成長，父親Frederick William Perry在他4歲時離開家庭，秋生與媽媽相依為命。去年秋生開始尋根，今日BBC報道他的同父異母孖生哥哥專誠來港見面，秋生受訪時表示兄弟重逢令他內心改變了，最快8月會去澳洲見失散家人，媽媽見到兩位哥哥時很激動，翌日更因血壓高入了醫院。

今日秋生接媽媽出院，並分享兩位哥哥是在上星期來港，共聚了一星期，「大家傾偈、飲食，周圍去，好開心，前幾日返咗澳洲喇。報道好犀利，好多記者問我嘢。」他透露媽媽因血壓高、血含氧量不足及心臟與肺氣腫需入院，休息幾日身體已好轉可出院。秋生又搞笑指媽媽見哥哥當日好醒神：「平時同佢講嘢唔睬我，嗰日佢就嗯嗯咁應，乜都知咁。」

提及尋根過程，秋生表示去年在面書上載一家三口合照後，獲BBC訪問，再有幾位外籍女士幫手搵資料，他直言甫相當日飲醉酒，尋根成功似中六合彩。問他見到哥哥一刻說了甚麼話？秋生謂：「How are you？Welcome to Hong Kong嗰啲囉。（哥哥識唔識廣東話？）識識哋，佢哋喺香港長大，17歲先返英國，佢哋叫自己做『木頭』。（會唔會帶埋媽媽去澳洲見佢哋？）唔搭得飛機，我去，佢哋嗰邊有成廿幾人，咁大棚人梗係燒嘢食啦。」