重申告別棟篤笑不設巡迴 黃子華：今次101%香港本土題目

黃子華今年7月舉行的棟篤笑騷，將是他的「收咪」之作，他坦言早有此打算，並強調不是退休，到時開騷再同觀眾講清楚收咪原因。雖然黃子華叫大家不用擔心出現「絕望座位表」，但今次的告別棟篤笑門票必定一票難求。

今日凌晨黃子華面書專頁上載短片，再為收咪一事解畫，「今次個騷名叫《金盆o浪口》，佢係一個真正嘅階段，係小弟金盆o浪口，原本係想叫黃子華最後一個棟篤笑，不過我團隊認為太決斷。我甚至諗過呢個騷好似Michael Jackson咁叫《This Is It》，不過俾人鬧死，太過凌厲啦啲名，所以用我好多年前諗過嘅名，呢個係小弟原則上最後一個棟篤笑。」

提及棟篤笑的巡迴演出，黃子華重申不會巡迴，因為今次的棟篤笑主題是香港，「我以前去第二度做騷，好多時候啲朋友都會問：『會唔會講吓馬來西亞、三藩市或者廣西吖？』好多時我真係會擺當地材料落去，但今次真係101%香港本土題目，如果去第二度巡迴係對大家不負責任，所以唔會巡迴同埋的而且確係最後一個棟篤笑。」