大埔紅Van「舞龍」 全車乘客嚇怕提早落車

大埔公路雙層九巴翻側悲劇，令司機駕駛態度再次成為公眾焦點。近日有網民在社交網絡爆料，指深宵坐小巴回大埔時，司機如同「舞龍」般駕駛，令到車上乘客都心驚膽顫，全體提早下車，令到不少網民熱議。

有網民在Facebook群組「Tai Po 大埔」表示，昨日（22日）凌晨約12時乘搭由旺角駛向大埔的小巴，結果小巴司機駕駛時左搖右擺，「條友揸唔到正線，不斷行入雙白線，入獅隧亦是，之後全車都嗌有落，然後喺大埔舊路上山起點落車。」

另外有網民亦上傳一段疑似小巴內的片段，由片段中所見當時車速每小時逾60公里，司機背影搖搖晃晃。有乘客開口勸說司機將車停泊到路肩，又有人言道「冇人會怪你」、「16條人命呀大佬，慢慢泊埋打死火燈啦」、「你調一調位，畀你抖一抖」。惟小巴司機似聽不到乘客的話，未有將車泊停路邊。最後全車人無奈於山路下車，發帖網民更質疑司機「take咗野」。

不少網民均指曾經有類似經驗，更有人懷疑遇到同一個司機，「呢條老童司機我都撞過一次，起山路騎雙白線，去到廣福紅燈衝燈！去到投注站冇人叫落車就無啦啦開車門停車，到咗寶鄉橋燈位就綠燈停咗車……忍唔住開口鬧佢『捨得開車未呀，綠燈呀！你瞓醒未呀』先肯開車」、「搭過佢幾次出旺角，佢上個月先開始揸呢條線，點解咁肯定？佢第一次連點入馬場都未識，要客教佢入馬場，初頭兩三次坐都好精神，近呢兩次搭佢車，真係嚇都嚇死人」，又有人笑言「全車嗌有落好壯觀」。