32樓外牆工作無搭棚僅綁麻繩 住客師傅齊捱轟

處理大廈外牆工作必須搭棚，但近日有住客上載圖片，指有師傅在大廈32樓外牆免搭棚維修水管，形容他「真係藝高人膽大」，更指「2000蚊真係抵俾佢」，圖片上載後隨即引起網民批評，涉事網民和師傅罔顧安全，隨時搞出人命。

涉事住客在Facebook「大埔」群組上載圖片，見到一名師傅在外牆工作，外面未見有任何棚架，而師傅身上更只綁上麻繩，險象環生。上載圖片的住客指出該處位於32樓，形容師傅「藝高人膽大」，更指一個願打一個願捱，「2000蚊真係抵俾佢」，圖片上載後不久就已被刪除，但已被網民「留底」，紛紛批評兩人罔顧安全。

網民都認為，無論是顧客或師傅，都應該按法例要求搭棚，保障自己和途人安全，「啲人渣係咪冷血㗎！我寧願比貴啲都唔想害人冇咗條命囉！仲話做晒安全措施，有意外咁點算?！做人好心有返啲人性啦！」、「其實兩邊都有錯，個師傅為咗搵多少少搵命博，呢次好彩唔代表下次都好彩，個客就唔識諗，寧願唔俾佢做搵第二個都好過佢咁，有咩事你內疚一世架」、「為咗呃like 你可以去幾盡」。