大讚老公貼心滿Fun！準靚媽熊黛林孕照留念

去年年尾宣佈懷孕的熊黛林(Lynn)，預產期已經愈來愈接近，日前Lynn就同老公郭可頌非常恩愛地拍了一輯靚相留念：「希望第時同BB提起，都有相讓BB知道爸爸媽媽是如何幸福地迎接BB到來。」相中見Lynn笑得開心燦爛，雖然腹大便便但四肢仍然纖瘦，絕對是準靚媽咪，而穿起吊帶裙的Lynn，上圍都升級了不少。至於爸爸郭可頌亦愈來愈fit，手臂肌肉盡現，看來做型爸單手抱B都無問題。Lynn話：「一直老公都好照顧我，有了BB後老公更事事以我為先，我覺得好開心，睇得出自己真是無嫁錯人。」

作為準媽咪，Lynn現在未覺緊張，反而非常期待BB到來，但同時又有點捨不得與BB身心相連的親密關係：「每次BB在我肚入面郁我都好興奮。」問到Lynn有否特意看書學習湊B及教小朋友技巧，Lynn表示自己只看了小量關於育兒的書籍，平日反而多向有經驗的朋友請教：「我們都想順其自然，第時再一步步學習，我不想給太大壓力家人及BB。」果然是貼心溫柔的媽媽及老婆！