《殭屍II》演員歸位！袁文傑拖女友團拜亞視人

雖然新亞視經已開台，但有一些事情就往事只能回味，好似經典劇集《我和殭屍有個約會》就係其中一個！當年《殭屍》相信好多人都仲記得。
日前年初三，現時已過檔無綫嘅「游生」袁文傑，就同成班亞視人一齊團拜，個個都熟口熟面，袁文傑仲留言話「有阿祺，Ming Sir，文慈，去年因為工作，都少了大家的聚會時候，不過，又有何關係？」當中仲有《我和殭屍有個約會II》尹天照，有粉絲留言話「鐘意睇你同尹天照以前喺隔離台套親子情未了」、「文傑，我係將軍澳都成日見到尹天照，佢好nice，仲好好傾tim😄😄」。不過尹天照幾年前經已講過，成為基督徒後不再接拍殭屍片，仲搞笑話要拍《我和牧師有個約會》。
今次年初三嘅團拜相片，仲見到袁文傑女友張潔蓮低調出場，小鳥依人傍住「游生」，大放閃光彈！