年宵回收箱垃圾如「砌沙律鬥高」 網民嘆清潔工彷彿永遠追唔切亂拋速度

農曆新年前後，除了旺角夜市出現「垃圾海」，維園年宵市場的垃圾回收箱更出現「垃圾山」！拍攝到維園情況的網民形容，垃圾量「高處未算高」，慨嘆「一個個垃圾堆，清潔工密密掃都清唔曬，彷彿永遠都追唔切亂拋垃圾嘅速度」，質疑「其實夜市同年宵嗰班係咪同一班人嚟？」
有網民昨在facebook專頁「再見垃圾桶」上載多張在維園年宵舉行期間，於熟食攤檔附近拍攝到的垃圾回收箱情況，形容情況好像「食Buffet（自助餐）砌沙律鬥砌得高」，「垃圾桶滿曬就掉回收桶，回收桶滿曬就見位就插，啲鐵欄位都滿曬就隨便掉喺燈柱旁邊，一個個垃圾堆，清潔工密密掃都清唔曬，彷彿永遠都追唔切亂拋垃圾嘅速度」。

相中可見，其中一個啡色塑膠回收箱被放滿一層層的熟食紙袋、膠器皿、竹籤、膠樽、鋁罐等大量垃圾，靠在回收箱旁的地面亦出現了「垃圾小山丘」；藍色的廢紙回收箱亦有大量的熟食紙袋和膠器皿，與擺放垃圾回收箱本意相違。
該網民又在帖文問，「其實夜市同年宵嗰班係咪同一班人嚟㗎？咩人？我哋香港人囉！實在慚愧...」