離港拍劇患「思鄉病」 張兆輝減產陪細女異地升學

張兆輝一劇接一劇，早前更留在內地3個月拍劇集《陪讀媽媽》，從影多年，輝哥笑指第一次花這麼長的時間拍劇，亦是第一次因為出埠拍劇搞到思鄉病發。他說：「真係未試過花咁長時間去拍一套劇，又要飛去加拿大拍成個月外景，雖然同劇組上上下下感情好，但真係第一次拍劇拍到有思鄉病，所以在蘇州外景期間，見有3日假期，我即刻買機票飛返香港，見一見個女。」

跟隨劇組赴加拿大拍外景，輝哥亦有抽空到當地的電視台及電台做訪問，並重遇好多老友記。他開心謂：「我冇諗過一行入間電視台，幾乎個個都識，好多都係以前TVB嘅舊同事，大家起碼廿幾年冇見。最開心係撞返李婉華，雖然我哋只係1991年合作過一套劇叫《男人勿近》，算不上係老拍檔，但大家見返面，仲係好有親切感，接受佢訪問真係好開心。」
輝哥新劇《陪讀媽媽》，顧名思義是家長為了下一代的將來，不惜陪仔女飛到外地讀書。

一直愛女如命的輝哥亦提到細女今年會到外地升學，故下半年打算減產，像新劇的故事般做「陪讀爸爸」。輝哥表示：「工作重要，但屋企人更加重要，始終係孻女，真係孻心肝，我想開學前陪阿女早少少飛過去，逗留長啲時間，等佢習慣吓外地生活先，所以下半年會選擇性工作，留多啲時間陪屋企人。」