全家出動拍MV 張新悅宣佈佗第4胎：一不小心又有咗

41歲的張新悅淡出幕前多年，與老公育有3女，一家5口幸福美滿。今日她在社交平台上載短片，宣佈「我又懷孕 」，更搞笑承認今次「一不小心又有咗」，話老公冇做足安全措施。

張新悅自己作詞，搵埋老公同囡囡齊齊拍MV，在片中坦言：「近日好多人發現我拒絕佢哋嘅活動邀請，尤其是夜晚嘅派對，好似好支持但係又唔出席。更有人覺得我好唔畀面佢哋，唔同佢哋飲返杯酒，想藉著呢個自編自導自演嘅『電台』訪問，我想講聲抱歉，呢3個月嚟令大家有所誤會。」張新悅改編舊歌《一不小心》為《一不小心2018大肚婆》，唱出「一不小心又有咗囉，感覺很惆悵，明明話3個夠，點知俾老公呃咗」、「腰酸骨痛朝朝想吐」、「無厘頭天天在發福」。

作為3小孩之母已經好難，張新悅亦冇諗過又多個考驗，笑指「#生得太多有點兒悶唱首歌仔調劑下心情 #10幾年冇唱歌自家製作唔好嫌棄#送給所有大肚婆和媽媽聽」。她接受傳媒訪問時直認完全冇計劃過生第4個，心情有點惆悵，不過都要樂觀接受事實，老公則非常興奮，已諗緊BB改咩名。