林雪攬女跳完辣舞入醫院：床上啲嘢冇做好多年

黃子華、佘詩曼主演的賀歲片《棟篤特工》，請來多位友情客串的嘉賓演員，其中一位重量級助陣演員就是體重超過300磅的林雪。林雪今次搏命演出，拍到瞓醫院，源頭就要倒帶至去年3月林雪於「第11屆亞洲電影大獎」奪得最佳男配角，當晚得獎後他接受傳媒訪問時，曾透露之前拍《棟篤》後頭暈，結果要入院檢查，可能因為耳水不平衡導致不適。還原林雪拍攝《棟篤》實況，原來他拍偷情戲又要同惹火鬼妹床上跳艷舞，走來走去避大婆捉姦，結果搞到暈低直入醫院。

香艷火辣的背後，林雪唔止跳到差點甩褲，仲跳到冇氣，他說：「跳完乜都唔使做，床上啲嘢冇做好多年！」拍攝之前本來林雪好風騷，不時爆粗，又搞笑地拎隻襪塞住大婆把口，點知埋位跳完辣舞後即刻散晒，好彩無大礙，林雪好快又回復生猛風趣。