只讓囡囡現場見證封帝 王浩信同老婆攬攬錫錫補返

出爐視帝王浩信親自解畫，何以封帝的重要時刻只有囡囡，不預太太陳自瑤（YoYo）到場見證！
王浩信榮升視帝後首度出席活動，笑言是奪獎前接下的工作，是以還未加價。提到昨晚老婆YoYo未有跟囡囡一同出席頒獎禮，現場見證他封帝；他解釋說：「如果太太到場一定會搶去焦點，但又想囡囡現場見證到父親的努力和成績，所以由我媽媽帶囡囡到場，咁就不容易被認出，亦的確成功，如果唔係我講出來都無人知。（作出特別安排，是否心中有數預知一定稱帝？）唔係，只係如果有奬就希望囡囡在場看到，因為監製講過，奬項對小朋友係一個好好的課堂，可親身感受到努力是有回報及有滿足感。（太太與囡囡之間只能二選一豈非很慘？）唔好咁講，我只是想低調處理。（但太太就要獨自在家睇電視？）她在電視機上看到我夢想成真都好開心，因為知道是我多年來的夢想；昨晚返到屋企大家都有傾幾句。（有無攬攬錫錫恭賀？）一定有，哈哈哈，不過唔想將家事講晒出來。」說時，王浩信也禁不住甜笑，並稱稍後會一家三口一起慶祝。至於如何獎勵自己？就是努力令自己更健康。（攝影：李樹勳）