【出力拉票】被何遠東寸爆冇拎過視后 唐詩詠眼濕濕騷演技

《萬千星輝頒獎典禮》將於本月21日舉行，有份角逐獎項的藝人紛紛出力拉票。唐詩詠憑《不懂撒嬌的女人》Cherry一角爭視后，《降魔的》「龍貓」何遠東則力爭最佳男配角獎，二人聯手拍攝短片《不懂降魔的女人》，惡搞劇中經典橋段，互撐對方攞獎。

何遠東扮返的士佬「龍貓」，接載乘客唐詩詠，何遠東大大聲話對方從未坐上視后寶座，是個「不斷錯失的女人」，他串爆指：「你做戲咁耐有冇攞過獎呀？」唐詩詠谷出眼淚重演反擊Mall姐的一幕，爆Seed話：「嗰罌粥係你倒瀉㗎！阿媽搵藤條打我，你一句說話都冇幫我講過呀！」之後二人和好，互投對方一票。

輪到何遠東惡搞《降》劇慘死一幕，今次他帶埋唐詩詠落車逃過一劫，避開高空墜落的冷氣機。落車後二人討論台慶頒獎禮戰衣，唐詩詠笑笑口講「限奶令喎！」何遠東即提議「露背囉！」片段玩味十足。