剛小產完突然肚痛 陸永老婆：冇力到眼前一黑跌落地

陸永老婆Reina早前被爆不幸小產，今日她在instagram貼長文，謂同朋友去元朗食完糖水準備開車返歸之際，肚痛不知所措，「唔係想去廁所，但係都行去睇下個公園有冇廁所，痛到成頭冷汗，突然冇力眼前一黑跌低落地下，之後㩒住個肚漂眼水。同行位朋友唔熟路，報警都唔識講地址，好彩有兩個熱心人幫手，仲有位小姐畀紙巾我抹汗。另外喺車等我哋個位朋友，唔識著車閂返全車車窗又唔識鎖車，多得隔離車司機好好心幫我搞掂架車。
「上咗救護車後，我又唔痛喇，做完簡單檢查後，我要求落車，我唔想去醫院等幾個鐘都未見到醫生呀！但係仲係冇乜力，三個好好人嘅救護員話如果唔痛，可以休息多陣，唔去醫院都得嘅～～最後我上咗救護車，冇去到醫院！諗住搵代駕幫我揸車返屋企，但係冇預約又要入元朗，要等成個幾鐘先到喎...所以，我自己揸車走咗！返到屋企畀人強迫我去私院睇醫生，我都自己返到屋企啦～～仲入咩醫院，早啲瞓好過啦！#除咗跌損手腳其他嘢都好正常喎 #個肚離奇地一啲都唔痛 #多謝今晚幫助過我哋嘅人 #唔知可以用咩嚟形容今晚發生過嘅事」。
好多網民留言都叫Reina小心身體，及做個身體檢查較好；亦有經驗之談謂她應該是腸抽筋。陸永兩公婆於2011年婚後育有兩女，大女一穎細女一心精靈可愛，早前Reina佗第三胎男B時不幸流產。