【中文金曲】郭富城驚喜現身 勁唱勁跳《對你愛不完》

《第40屆十大中文金曲我和你音樂會》今晚舉行，西裝骨骨的郭富城驚喜現身，跳唱經典歌《對你愛不完》、《狂野之城》、《唱這歌》，表情、舞步做足100分，令全場High爆，台下歌手們都企起身拍晒手欣賞表演。

跳到成面汗的城城表演後接受主持訪問，問到他對十大中文金曲最深刻印象？他說：「係我做樂壇新人時，港台頒嘅最有前途新人獎金獎，1992年。因為呢個獎帶畀我好大動力同鼓勵，希望港台頒更多獎畀新人，同對香港樂壇有貢獻嘅人，希望港台唔止有40年，係有400年、4000年！」