喜奪「我最喜愛男歌手」 陳柏宇宣揚開心之道

陳柏宇（Jason）搣甩「隱世歌手」的稱號，去年開始人氣急升，更在昨晚的《叱咤頒獎禮》拿下男歌手銀獎及首奪「叱咤樂壇我最喜愛的男歌手」，他在台上也開心落淚。今日凌晨5時許，Jason在社交平台貼出獎座相，撰下得獎感言及宣揚開心之道。

原名為陳廣偉的Jason留言：「我係陳廣偉，亦係陳柏宇。喺2018年1月1號嘅呢一日，我成為咗世界上最開心嘅人。原因係我真正感受到為人哋而開心嘅樂趣，因為我真正了解到我做歌手嘅原因，係為咗可以令到更多人開心。方法唔係唱歌俾（畀）你地（哋）聽，而係用做歌手作為一個途徑去認識更加多人，張（將）我嘅諗法向一個一個人咁宣揚開去，目的係要令到大家都可以同我一樣咁開心，一樣咁感受到唔係凡事都要為自己出發先可以得到快樂。如果我為自己而開心，機會係，只有我自己開心。但如果我為人地（哋）而開心，咁起碼已經有兩個人開心（一個我，一個人地（哋））。
條數點樣計落，都係後者著數啲。再睇遠啲，如果每個人都係為人地（哋）而開心，就有可能全世界都開心。我知道一定會有人睇到呢到已經覺得我扮嘢，『呢個世界，邊有咁嘅人吖。』但我可以話你知，咁係因為你唔願意去相信，呢個世界會有唔自私嘅人。又或者好不幸地，你未遇上過一個咁嘅人。係有架（㗎）！我唔係第一個，因為我能夠有呢個諗法，都係我身邊嘅人教我嘅。我唔係最後一個，因為我相信，每個人，終有一日，都可以做得到。我相信你地（哋）！我係陳廣偉，亦係陳柏宇。喺2018年1月1號嘅呢一日，我成為咗世界上最開心嘅人，因為你地（哋）開心。」