【Shimba Column】Facebook觸及率降之謎

Facebook又係話要整頓動態時報上嘅內容品質！之前貼文演算法嘅更新已經令到專頁嘅小編都喊晒救命，今次仲降低定義為「參與誘餌」類型貼文嘅觸及率，叫一眾依賴Facebook 推廣宣傳嘅品牌媒體吸「粉絲」手法大減。咩叫「參與誘餌」類型貼文(engagement bait）？其實係指貼文中包含鼓勵或誘使投票、點讚、分享，呢類post可以加強粉絲互動同曝光率。每次只要你Comment、tag，甚至只係俾個心心，內容就會透過你嘅朋友圈子擴散到動態時報上，變相幫人賣廣告吸fans。以往呢類型做法都幾幫到品牌或者靠內容搵食嘅媒體吸納關注，但明顯今次Facebook嘅內容整頓，打爛如意算盤之餘仲打爛埋「小編」飯碗添！更新動態時報演算法後嘅Facebook將會嚴格把關，一旦發現違規post，就會降低專頁嘅觸及作為懲罰，話就話係要降低垃圾訊息，但其中商業元素嘅考慮真係耐人尋味。近年Facebook嘅貼文演算法愈來愈複雜，新聞內容都未必顯示到，唔少人已經轉用新聞App或者手機版網站，恐怕一眾媒體、品牌係FB專頁嘅經營策略係時候要改變啦！