【3兄弟幸福快樂】爆馬明計劃結婚？唐詩詠：嚟緊應該有排做兄弟

2017-12-27 12:50

劇集《鐵馬尋橋》的顧家兄弟妹因合作結緣，唐詩詠、鄭嘉穎、馬國明、黃嘉樂、林子善過時過節都會相約食飯。數一數，「鐵馬兄弟」只剩下詩詠未有著落，鄭嘉穎已有拍拖穩定的女友陳凱琳；林子善已同圈外女友Kary註冊結婚，明年4月擺酒；黃嘉樂都諗定與攝影師女友結婚。至於馬明亦講過同黃心穎「一係分手一係結婚」，現階段感情穩定。「鐵馬兄弟」昨晚食聖誕大餐，詩詠在社交平台上載合照，留言內有乾坤：「有乜嘢開心過我三個兄弟都幸福快樂，嚟緊我應該有排做兄弟嘞 #happy #鐵馬兄弟」。有婚事先會成為「兄弟團」成員，唔計林子善、黃嘉樂，詩詠都話蜜運中的馬明幸福快樂，43歲的大男人都係時候計劃婚事，唔知詩詠幾時做「馬黃聯婚」的兄弟呢？