【回顧2017】離譜司機和路人 今年邊單印象最深刻？

香港人多車多，無品司機及路人特別多。過去一年唔少網民分享咗司機、行人嘅惡行同危險行為，司機連環逆線行車、衝燈屢見不鮮；甚至有人邊揸車邊睇直播；無品行人都不遑多讓。回顧2017年，邊單最離譜？ 要數今年經典無品司機，相信不少人會記起一月時，一名駕駛四驅車的司機踩油「恰學神」事件。四驅車由沙田崗背街一停車場駛出，多次迫近一架正等轉燈、掛有學牌的電單車，更故意踩油加速切線，強行超越電單車，險釀車禍。結果任職港鐵的37歲司機涉嫌危險駕駛被捕，最後更被判180小時社會服務令同停牌1年！ 今年10月，一名司機揸私家車沿葵涌道駛向美孚期間，有交通警員響號疑示意司機駛埋一邊，但司機未有理會，後來警員再以擴音器大叫「入巴士站」，但司機繼續懶理，更在3分鐘內連環衝紅燈4次及逆線行車8次，期間險象環生，被網民形容為「馬路炸彈」。 11月中亦有一名貨車司機在荃灣海興路垃圾收集站對開，疑違例在雙黃線停車上落，被交通警抄牌。司機嬲到不斷向警員爆粗破口大罵，斥對方「怪頭怪相」，又做出粗魯手勢挑釁。不過警員一於你有你罵，仲冷靜回應「多謝你呀老闆！」繼續照派「牛肉乾」。 不少職業司機可能因工作壓力大，比較急躁。上月23日晚，兩架九巴在太子彌敦道疑因切線問題幾乎相撞，兩車長事後竟因為鬥氣拒絕讓步駛開，尾隨另架九巴嘗試從第三線駛過但唔夠位，結果3車癱瘓彌敦道北行線近半個鐘。最後警員警誡有關車長後，3架九巴先離開。涉事車長「小學雞」行為，被網民鬧爆。 早前又有網民就貼圖，指有小巴司機行車期間，疑用手機睇靚女網上直播，認為司機危險駕駛。不過，有人就認為圖中見到的，可能係涉事司機手機的螢幕保護（Screensaver）。 除咗司機離譜，不守法的路人亦不少。今年初一架九巴駛入秦石巴士總站時，兩名男子正橫過行車路，兩男明知巴士要埋站，仍繼續走在車路上。車長加速行駛一刻，其中一名男子更故意停步，更轉身指罵車長，成車人被阻。 至於亂過馬路就經常發生，而且不一定是長者！今年10月，有婦人「遞遞手」就過馬路，雖然近線私家車司機已讓路，但該婦人未有留意隔離線車輛，而且當時車輛車速快，婦人想行快兩腳，結果不小心跌倒，險被對頭私家車輾爆頭！