明白被性侵痛苦 林作：我媽媽都係受害者

前大律師、麥明詩舊愛林作，日前評論「欄后」呂麗瑤自揭被性侵的文章為「雕琢而成嘅商業文案」，又認為現今社會中只需要集網民之氣就做到明星，同時中肯地道出「個男人呢？其實佢未定罪喎，案件甚至連司法程序都未進入，已經俾石頭掟死啦，駛乜判？定真係覺得網民定生死就可以？」有不少網民批評林作搏出位，今日他在社交平台貼出網民的評論再撰文回覆，認為香港法治意識越來越越薄弱，凡事都只有法庭才可審判。他更稱媽媽也是性侵受害者，令他明白當中的痛苦。 林作全文如下： 我支持大家走出來。但不同意借助呢種事出黎（嚟）別有動機。我並唔係扭曲事實，而係作出我自己觀察事態嘅判斷，確實係有疑點。無論如何，香港近年法治意識越來越越薄弱，十分危險，希望你能以大局為重，明白只有法庭先可以審判。更加多嘅案件應該被帶至庭上見分曉，而唔係你話對方有罪就算。我唔係唔同情受傷害嘅女性。我願意同你分享，我自己媽媽都係過受害者，而我呢世人最重要嘅人，就係媽媽。佢最近都有分享過佢嘅經歷，我實在十分明白嗰種痛苦。 我十分願意幫助有需要嘅受害人。或許我應該更公開地作出表示。我做過一段時間嘅大律師，自己也接觸過幾宗非禮案。我十分願意私下就個別案例分享自己見解。