at17酒店房全裸拍MV 林二汶：友誼嘅成長

盧凱彤（Ellen）和林二汶今年重組at17 ，將於下月22至24日在伊利沙伯體育館開騷，今日發放新歌《18》MV，當中Ellen和二汶全裸上陣，解Bra扣、騷紋身。MV由Ellen老婆余靜萍執導，只有她們3人在酒店房內拍攝。一手湊大at17 的黃耀明、周耀輝、蔡德才和于逸堯更為新歌獻聲，令歌曲別具意義，二汶話聽到毛管戙。 《18》MV表達成長和蛻變，二汶說：「我和Ellen都過咗3字頭，已經唔再青澀，自從Solo之後，我哋都大個咗，就好似踏入18歲，成年啦，要為自己負責，可以做自己想做嘅事，呢個階段都幾得意。」MV裏二汶全裸露背、Ellen全裸僅以雙手遮掩重要部位，她們的紋身都清楚可見。還有騷乳齒、塗指甲油、配以蝴蝶翅膀效果等畫面，都有蛻變和成長的寓意。二汶說：「愛自己身體、接受自己身體都係一種成長嘅表現，全裸拍攝有呢個意思。MV由小余拍攝，喺酒店房拍，好安全和值得信任嘅地方，只有我哋3人，比我想像中感覺更舒服，今次亦係我哋友誼嘅成長。」她還透露MV中出現的一顆牙齒，的確是她和Ellen其中一人的乳齒。 一手湊大at17的黃耀明、填詞人周耀輝、音樂人蔡德才和于逸堯在《18》 中發聲支持，當中周耀輝更是第一次錄音，很有紀念價值。二汶說：「呢首歌裏面出現咗呢4個男人嘅聲音，佢哋對我哋好重要，係湊大我哋嘅人，由佢哋唱『靈魂直至骨肉』非常貼切，我哋聽到毛管戙！」