九龍塘的士未閂門就開車 4歲童被拋車外拖行受傷

九龍塘日前發生驚險意外！一名4歲男童偕同母親落的士時，趁母親忙於找贖期間，再度登上車廂內等待。司機未有為意，竟在未有關好車門下便開車，男童失平衡被拋出車外，更一度被拖行。事發的車cam片段其後流出，有網民批評涉事的男童、家長及司機三方均有責任，亦有人嘲諷「優質的士，快、狠、蠢」。 事發在上周一下午4時許，現場是九龍塘一大型商場的士上落客區，根據車cam片段可見，當時一名女子及一名男童先後落車，女子其後站在車門旁忙於與司機找贖，男童百無聊賴下又登上的士車廂。司機找贖後，未有察覺男童還在車廂內，竟在未有關好車門的情況下開車離開。 男童頓時失平衡慘被拋出車外，被車門撞傷，更被拖行一段距離，女子發現後慌忙喝停司機，並上前查看男童傷勢。司機隨即停車並落車了解。男童背部及腳部擦傷，清醒由救護車送院，幸無大礙。 事件引發網民熱論，有網民怒轟司機「門都未關就開車？」、「開住門都開車咁算乜呢」，亦有網民指三方均有責任，「點解落咗車先畀錢？」、「一個唔拉手掣、一個落咗車又痴返埋去，打和啦」。