著55磅戲服高溫下拍打戲 任達華呻辛苦易受傷

奇幻動作電影《鮫珠傳》由任達華、王大陸、張天愛、蔣璐霞等聯合主演，在戲中任達華與蔣璐霞飾演羽毛族後人，每天要穿上幾十磅戲服，又吊威吔又打鬥，結果打到飛起都安然無恙，反而穿戲服及化妝卻令他們受傷。 任華達表示是他拍戲多年最辛苦的一部，因為今次導演重金禮聘請了荷里活化妝造型團隊來協助，任達華說：「今次導演用咗幾百萬元由加勒比海請咗一隊專人來設計造型，我每日要有8個工作人員同我著件40磅重嘅戲服，個頭套都有15磅，日日幾十磅重孭上身好辛苦。」

任達華又苦笑謂要在一個近50度氣溫、密不透風的環境下拍攝，化妝師在他戲服背後剪開了3個小洞，是給他抖氣抹汗。他說：「開頭幾日我拍到腳抽筋，因為大量流失鹽份，而且件衫同頭套太重，要每日有請個脊椎醫生在場，因為我經常頭痛。我初時都唔明點解要件衫咁重，因為戲服全件係皮做，導演話要有質感。」 由於任達華的頸部肌肉變硬，他完成一個鏡頭後也要將頭仰後10多鐘休息，他又自讚敬業兼EQ很高，拍完之後也留在片廠看拍戲，他覺得辛苦得來有價值，尤其在特技上令他嘆為觀止。