陳豪不抗拒追第4胎 撐陳茵媺努力減磅復工

因為老婆陳茵媺（Amiee）正復工拍電影，姍姍來遲的陳豪，在《跨世代》煞科宴上自言做湊仔公都能應付自如，因為媽咪教得好。談到可會保持一身肌肉？他說：「會盡量Keep住，我對整體健身有興趣。人哋見到覺得我辛苦，其實我幾enjoy。（咁大隻Amiee有無捽吓你？）咁又無，哈哈哈！」

提到Amiee復出但身形略胖，他第一時間護妻，說：「無！佢已經好努力，已經瘦咗個半碼。我嘅努力亦感染到佢，佢都會努力。」此外，提到現在有心有力，可會追第4胎？陳豪笑說：「唔會Say No，但依家都幾忙。我哋都鍾意BB，多啲嚟密啲手，但係要攤長啲唔好咁密。無健康體魄，又點會有健康BB，哈哈！」（攝影：譚志光）