馬路飛馳拍MV 梁漢文險連人帶琴拋出車

梁漢文（Edmond）早前為新歌《纏綿朋友》拍MV，這次拍攝險象橫生，因為他要在拖板車上一邊彈琴唱歌，一邊在馬路中飛馳，令他在崎嶇路途上險些連人帶琴拋出馬路，眾人也為他抺一額汗，他自己更驚到拍拍心口定驚！

Edmond於下月舉行音樂會，近日他除了忙於排練外，亦不忘錄新歌。早前他為主打歌曲之一的《纏綿朋友》拍MV，他坐在拖板車上彈琴唱歌，沿著英皇道由柴灣拖到去中環，途中原來發生了驚嚇事件。Edmond苦笑說：「其實彈琴對我冇乜難度，我成日都彈，不過今次嘅方法好高難度，我全程要畀架貨車拖住，我同個琴就用拖板拖住喺後面行，真係唔行唔知原來香港啲馬路咁凹凸不平，當時由灣仔去中環要上橋，途中啲路已經唔平坦，仲要上上落落，喺落橋時候發生咗啲狀況，差啲震咗出拖板外，我真係嚇咗一嚇！」

Edmond又笑謂，整座鋼琴是有大繩綁住，反而他就沒有安全帶綁住，不過他相信工作人員是安全至上的。為MV拍了一個通宵的Edmond，拍到清晨時份馬路上已經車來車往，Edmond自言有如吸塵機，因為有時會與其他車並排而行，他便吸盡廢氣。