【又死server？】TVB開騷谷新App網民呻入唔到　嘟姐：畀啲耐性

TVB旗下的免費手機直播應用程式「大台網」（big big channel），今日正式啟動，個App有遊戲玩，亦有唔少主題專區提供不同資訊。今晚TVB專登搞埋直播特備節目狂谷新App，群星拱照加埋網紅KOL推介，兼且不停叫口號呼籲大家下載新App，十足慈善騷叫人打電話捐款。可能太多人湧入big big channel，搞到唔少網民都投訴入唔到個App，Load極都係「網絡繁忙，請稍後再試」，真係有啲醜怪。主持人鄭裕玲（嘟姐）即在直播騷中試圖安撫大家：「依家big big channel係有啲塞車，大家畀啲耐性。」

同類事件令人不禁諗起2012年港姐玩「普選」，臨門一腳死server，網民冇得投票，臨場由評審選出三甲。今次Sell新App又有死server事件發生，有些少失禮喎。 另外，TVB為谷big big channel，揼本每位藝人送一部iPhone 6S，加埋上網plan，叫藝人多多開Live。陸浩明直擊拎iPhone一刻，仲話：「嘩，好似搶包山咁熱鬧，大家快D睇片啦」。