草蜢爆古天樂成日呃人 　客串《喵星人》扮騙徒 　

由陳木勝執導、古天樂主演的合家歡科幻喜劇《喵星人》，除了主角巨貓「犀犀利」可愛夠吸晴外，一班串星亦相當有睇頭，好似草蜢、衛詩雅、盧海鵬、蝦頭和阮兆祥，位位搞笑功力一流。當中草蜢更突破飾演騙徒三人幫，他們聯手騙取古仔300萬，不過三人卻大爆真正成日呃人的竟然是古仔呀！

劇中草蜢三子蔡一智、蔡一傑和蘇志威，分別飾演假扮泰國賣家、假扮內地賣家和偽歷史學家的騙徒，他們串通騙古仔購買假藏寶圖，令古仔傾盡300萬家當，不過最搞笑是他們被踢爆騙局走佬時，見到明星貓「犀犀利」時，都不忘集郵。三人難得相隔多年再度合體拍戲，雖只是客串性質，但貫徹工作認真態度，事前跟導演和古仔密密斟研究角色及演繹方法，期間眾人不停爆肚，氣氛融洽。當中演乸型騙徒的阿智，更專登油上紫色指甲兼畫上粗眼線配合，「妖」味十足。

對於三位合體演出喜劇，傑仔說：「工作之餘又玩得好開心，冇太大壓力。」而蘇老闆則透露與古仔識於微時，由劇集《刑事偵緝檔案》至今合作多次，又大讚古仔近年的喜劇非常出色。問到蘇老闆及傑仔對阿智乸型造型有何評價，兩兄弟竟笑指角色根本是他本人，搞到阿智急急反擊：「佢哋迫我做，又將佢哋屋企嘅泰傭投射喺我身上。」至於三位可曾遇上真正的騙徒？阿智急不及待爆料：「喺生活上試過一次大啲騙案，嗰個人成日話自己唔健身，但身形非常大隻，古天樂呀！仲話自己瘦，大騙徒！」