預祝祖兒37歲生日　阿Sa京劇腔高歌贈慶

容祖兒聽日37歲生日，連日來已收到不少生日蛋糕，日前又與數百位歌迷BBQ預祝生日。昨晚祖兒與好姊妹蔡卓妍（阿Sa）及經理人霍汶希等人食飯、切Cake慶生，席間阿Sa孖祖兒開心拍片，高歌「年年歡樂，歡樂年年」，認真趣怪。

壽星女祖兒大晒，即場要求阿Sa加碼，唱歌贈慶，仲點唱《下一站天后》。不過祖兒玩玩新意思，叫阿Sa用京劇腔、平喉腔演唱，身為玩得之人的阿Sa一一照做，加埋京劇造手，好鬼投入。好友謝霆鋒同樣有表示，傳短訊畀祖兒預先講明聽日牛一正日會送上蛋糕，祖兒則搞笑地對住電話講：「多謝你吖謝霆鋒，好靚仔吖，都唔明點解唔畀驚喜我嘅。」