【星媽過母親節】楊千嬅拖囝囝行街　陳敏之趙頌茹有仔女萬事足

「世上只有媽媽好」，阿媽十月懷胎生B，棉乾絮濕湊大仔女，母愛真偉大。聽日就係母親節，一眾星媽有仔有女萬事足，唔使做咩特別事，望住心肝椗健康快樂成長已經足夠。 近排忙於四圍飛宣傳新片的楊千嬅，今日抽時間拖實即將5歲大的寶貝仔丁進諾（Torres）行街街，並在社交平台開心分享背影合照。見Torres大個仔幫手拎嘢，唔個袋戰利品係媽媽定Torres嘅呢？

「索腿天后」陳敏之去年底誕下囝囝「雷冬至」子樂，今年首次以媽媽身份過母親節，雖然子樂未送到禮物畀媽咪，不過陳敏之望實B仔啜奶嘴的覺豬樣，已經冧到爆。

另外，身為單親媽咪的趙頌茹（Yu）已收到兩位囡囡「愛的錫錫」作禮物，Yu更在社交平台上載Kiss相，並冧爆留言：「感謝天父給了我有信希和愛希，在她們身上常常讓我感到很多的愛！她們每天的索吻，要愛的抱抱及說『我愛你』的次數真的多到我也投降了！」