爛身爛勢住籠屋　鄧兆尊拍新片收6位數酬勞　

鄧兆尊近年淡出娛樂圈，相隔8年之後，早前再接演一部網絡電影《失業皇帝2017》，好多人認為已故「祥哥」新馬師曾遺產剩落大把，鄧兆尊一定唔憂做；不過，早排祥嫂（洪金梅）又話，兆尊高調晒3個女友，係想搏曝光搏復出喎。究竟兆尊係唔憂做，定搲撈呢？ 投資《失》片嘅老闆向展邦、向展威兩兄弟向《東周刊》爆料話，係自己主動接洽鄧兆尊演出嘅，有少少係因為睇到鄧兆尊呢排嘅新聞，想搵個有份量同有啲名氣嘅演員，好自然諗起佢。加上安排鄧兆尊演住籠屋靠賣舊電器維生嘅「財哥」，無論外形同感覺，鄧兆尊襯晒個角色。向氏兄弟仲話，今次搵鄧兆尊一共拍咗4場戲，酬勞有6位數。鄧兆尊都好易話為，冇喺價錢上計較過，可以話大家係一拍即合。

在拍攝現場，鄧兆尊扮演籠屋居民，因為被大集團逼遷，而著晒「血衫」抗爭，睇佢爛身爛勢，演得都好投入。鄧兆尊話今次拍戲，最想睇吓依家同以前有乜唔同：「依家啲拍攝手法唔同晒，兩部機一齊拍，唔使由朝等到晚。同埋後生一代嘅演員，我都唔熟，可以乘機了解吓佢哋，有乜新思維同埋新諗法。」