票房報捷有助康復　劉德華想出山拍續集　

由邱禮濤執導、劉德華擔任監製兼主演的電影《拆彈專家》上映以來至今於中、港台及星馬等地衝破三億一千萬港元票房，今日於尖沙咀舉行慶功宴，一眾演員姜皓文、吳卓羲及蔡翰億（Babyjohn）等出席。由於劉德華養傷中未能現身，不過安排即場致電給他。華仔說：「我係劉德華，大家好！所有兄弟姊妹多謝晒。台前幕後手足花好多時間幫我宣傳，多謝晒！仲有導演，第日一定雙倍奉還，最開心勞動節大家勞動完就有開心嘅成果。唉吔，我都唔識點講，多謝所有入戲院支持嘅觀眾。」當司儀問到華仔有何說話跟在場的手足講，華仔謂：「我哋開第二集啦！」司儀又叫華仔快返出來，華仔指一定會，聽到票房報捷也康復得快些。

連日來忙於到國內為該片不停宣傳的吳卓羲，指於南寧站謝票時，觀眾反應很好，他說：「有啲觀眾問我會唔會返無線拍劇？但我話暫時講呢部戲為主，始終喺電視圈認識我，又問幾時拍《衝上雲霄》。」他表示未有聯絡劉德華，但對方有時傳視頻給老闆讓大家到不同城市宣傳時播放，又指希望在電影方面發展，突破自我，本月中則會拍攝網劇。 姜皓文（黑仔）表示開心，望票房繼續上升，又指搭建紅隧爆炸場面，有內地觀眾以為獲得當局批準在紅隧內拍攝，感覺好真實。Babyjohn笑指今次演出被內地觀眾封為「催淚漢」，因為大家睇得好感動，表示睇首映時沒有落淚，但第二次買飛入場睇就喊。他說：「睇完最開心發現地上好多紙巾，睇到個場濕晒。我覺得自己好變態，見到他們喊就開心。」