周柏豪眼濕濕唱情歌　讚老婆不斷付出好偉大

周柏豪紅館騷昨晚開鑼，向來感情低調的他，在演唱會上向太太Stephanie Chu大講「愛的宣言」，表示用音樂紀錄自己與太太的點滴，創作了三首歌，其中一首是當年寫給她的生日禮物，亦是二人的一周年禮物，隨即獻唱《天光》。柏豪續說入行前已認識對方：「一齊成長十幾年，佢將所有最黃金嘅青春奉獻畀一個未必寫包單嘅人，我係個麻煩友，喺生命中搵到一個完全可以體諒自己嘅人好難，但係我搵到。」

獻唱《我的宣言》後，柏豪自爆對太太是一見鍾情，憶述當模特兒時很瘦，還被Stephanie稱呼做「瘦奀茄」。柏豪表示當時自己塊面爛晒不出街，因患有驚恐焦慮症，躲在家裏9個月，是她不斷鼓勵，在這9個月去學琴、學結他和寫歌。他說：「嗰時得佢有工作，我冇工作零收入，有時佢在經濟上幫我，我乜都買唔到，只識寫歌，所以寫歌送畀佢，剛才兩首歌係畀佢嘅禮物。有時半夜有情緒問題時，叫醒佢聽我唱歌、傾偈。十幾年時間過得好快，去外國時仲有啲似剛約會感覺。」 柏豪講到去年11月在泰國布吉結婚，一位歌手好友告知出面有狗仔隊，他驚到不知如何是好，個腦很亂，因籌備已久好想低調。當時太太突然問他一句「個婚禮使唔使hold住」，柏豪覺得太太好偉大，多謝太太為他做了很多。他指紅館外型就好似一粒鑽石，終於可以在此正正式式唱這首歌給她，說到此時即眼濕濕獻唱《終於我們》，螢幕展示出柏豪與太太的剪影合照。其後，他又感激90多歲的姑媽一直很支持他而感觸。