吳若希衝出嚟解畫　網民勸何哲圖室內禁煙

星夢老闆何哲圖（Herman）早前為鄭俊弘與何雁詩急拆彈，堅稱二人係朋友，豈料鄭俊弘、何雁詩轉個頭即十指緊扣現身機場，公開認愛，激嬲Herman，繼而煞停鄭俊弘的工作。今日有報道指Herman一支公遊旺角，更憔悴地扯煙，頭痕公司旗下歌手戀愛大過天，鍾嘉欣、吳若希亦因生B突然淡出，令Herman有感培育「仔女」後，卻被欺騙。 吳若希為Herman急澄清，上載自己與Herman在辦公室的合照，並衝出嚟認衰仔：「係我衰～ 係我果（嗰）日返公司探老闆～ 又同老闆食左（咗）個好豐盛既（嘅）Tea，呃吹水吹到7點幾，搞到老闆遲收工截唔到的士，就被人話佢憔悴煲煙！」 吳若希更Hashtag「#我老闆張檯有d（啲）亂 #亂中有序 #其實何生成日都係（喺）旺角 #次次都落街煲煙上的士 #古有清明上河圖 #今有星夢何哲圖」但吳若希出言解釋又愈幫愈忙，有網民發現Herman的枱上面有個裝了煙頭的煙灰缸，便引用室內工作間禁煙條例，勸Herman戒煙兼多加留意條例。