Kelly Online：九龍塘糖葱餅伯伯離世　網民：伯伯笑容無價

「好好食，唔買就走寶」每次由港鐵九龍塘站去又一城商場經過天橋，都聽見到一對公公婆婆賣潮州糖葱餅。有網民喺Facebook出Post指，糖葱餅伯伯喺3月11日過身，只剩婆婆開檔，呼籲網民幫襯婆婆，俾佢關心之餘亦幫佢度過難關。 Facebook專頁「名校 Secrets」噚日上載伯伯嘅黑白相，話佢已經係月初離世，而婆婆喊咗好多日，直到噚日先開翻檔。 有網民分享佢被糖葱餅伯伯感動嘅經歷，「話說前年冬天得一兩度，有次行過見到個後生仔同伯伯講話要60個糖葱餅，伯伯起初仲以為係六個，但當佢知道係60個嘅時候，佢好開心，跟住企左起度密密整，佢知道有人欣賞佢嘅糖葱餅流露嘅笑容係無價，半個鐘之後個後生仔返到嚟拎，而一袋袋嘅糖葱餅已經準備好。呢個時候伯伯又企係身整多左一個俾個後生仔，佢笑笑口咁話『比你一路行一路食』當時個後生仔好感動。」 嗰名網民仲話：「幾蚊一個糖葱餅 對其他人黎講 或者唔係啲乜 但對伯伯黎講 就近乎係佢既全部」。