囡囡張靖Karina重7磅半　張繼聰肉赤老婆開刀宣佈Kay封肚　

再當爸的張繼聰下午5時許，帶著曲奇小禮物步出醫院見傳媒分享太太謝安琪（Kay）生女心情。他透露囡囡於下午3時多出世，重7磅半，由於有過上次順產經驗，今次開刀，他沒上次般失禮在產房猛講唔該、多謝，盡量壓制自己坐在一旁，整個個程他都好感動，並大讚：「太太好叻，囡囡都好叻，好快出世，跟住聽到佢喊聽。」講到親手剪臍帶，有過上次經驗他都要剪3次才完成。 阿聰自爆原本想保持硬漢形象，醫生更寄以厚望叫他講笑令太太不要緊張，但他自稱從未試過咁乾塘，只能像小學生運動會般講加油。他說：「感覺到太太好偉大，見個手術過程，好肉赤，所有女士都好偉大，我老婆都好偉大，所以兩個夠晒數，除非男人可以代生，我就會生，都覺得肉赤。」 談到母女現在情況，阿聰謂老婆餵完一次母乳，說：「當然好甜蜜，個女一見我就捉住我隻手，將我手指揩埋佢塊臉度；我同太太傾偈時佢望住我跟住喊，即刻諗起我要小心處理，否則錫晒個女唔理老婆唔得；太太做完手術依家好攰，麻醉藥慢慢散，佢都話比想像中攰。」 阿聰自稱仍激動，護士長幫他們一家三口拍照時，他自覺未能Keep靚樣，但老婆同女都Keep到。另外，晚上會接升做哥哥的張瞻到醫院見妹妹，阿聰坦言期待兄妹見面一刻。至於囡囡已改名張靖，「靖」這個字是他自小已喜歡；英文名就早在Kay懷胎1個月時想好另外一個名，但有一晚阿聰發夢，夢見有個可愛小女孩跟他說要叫自己做Karina，要同媽咪一樣由「Ka」開始，阿聰謂當時都未知胎兒是囡囡，同Kay講應該是女自己報夢自己選名字。（攝影：張家宜）