玩轉錄音室　楊千嬅孖好姊妹錄歌：笑到收唔到掣

楊千嬅和余文樂主演電影《春嬌救志明》，早前網上流傳中女唱K視頻，余春嬌（楊千嬅）與2位閨密Brenda（林兆霞）和Isabel（陳逸寧）自組女團「MKB48」又唱又跳Raidas金曲《傳說》。日前3女拍MV時自創舞步，亂唱疊晒嘴喪笑，玩轉錄音室！ 「春嬌志明系列」來到第3部曲，每集都會加入90年代經典歌曲突顯劇情，《動地驚天愛戀過》、《別問我是誰》在戲裏舉足輕重，上映時更掀起全城話題。千嬅透露今集《春嬌救志明》將會推出原聲唱片，戲中Brenda和Isabel兩位好姊妹為氹余春嬌，開心又唱又跳《傳說》一幕，是這張原聲唱片的重頭戲。為隆重其事，3位好姊妹專登book錄音室認真地錄音和拍MV。人生首次踏足錄音室的Brenda和Isabel，表示心情非常緊張，唱錯歌詞、入錯拍子，非常搞笑。加上大笑姑婆千嬅在場，隔住錄音室厚厚的玻璃，都聽到她們的笑聲。 接受訪問時，千嬅坦言：「其實我哋今日已經好收歛，平時更加瘋狂，笑到收唔到掣。因為識咗8年、合作咗3集，拍到入晒血，抽離唔到，將戲裏經驗當成現實！」事實上「春嬌團隊」經常約埋唱K聯誼，千嬅說：「去到唱K，我好少唱自己歌，甚至好少唱歌，平時工作唱太多，我通常同朋友玩、聽人哋唱或者跳舞，好熱鬧。」