「105%慳妹」Macy愛周遊列國　阿媽有份借首期　做文員月入4皮

由無綫編導岑應製作的真人騷節目，每次都掀起全城熱話。近日她再下一城，以置業夢為主題的《有樓萬事足》，未出街已因「高潮」Seasun言論出位，被網民極速人肉起底。 至於被轟自私、不孝的「105%慳妹」Macy，同樣充滿話題性，她被塑造成，為慳錢而黐飲黐食的超級無敵「菠蘿雞」，縮骨行為連阿媽都討厭。不過最新一期《東周刊》訪問過Macy，發現她可以21歲，坐擁一個300多萬的旺角單位，並非靠「縮骨慳家」這般簡單。 月儲105%的慳妹Macy，以5年時間儲了接近40萬的首期，以9成按揭，去年購入一個價值300多萬的旺角舊樓單位。可是慳妹故事另有版本，據知Macy一向喜愛周遊列國，高峰期可以一年去兩次美國旅行，亦先後去過日本兩次，閒時放假也有去東南亞地區旅行浸Spa。上車後，扣除每月供樓款項，Macy仍有大量錢去旅行歎世界、買名牌物品，理財之道果然高超。 愛旅遊的Macy，被發現在2015年2月，以美金$339（約港元$2600）申請全球機場貴賓室（PRIORITY PASS）的尊貴會籍，好捨得使錢。Macy接受《東周刊》訪問時，直認會與朋友出外食飯，並且AA制，而前男友長居紐約，聲稱未分手前，去美國的機票由男友畀。Macy坦言首期有一部份問阿媽借，但已還清款項。 此外，Macy指自己做文員，行業好景時試過月入4萬元，問她做盛行？Macy支吾以對：「都係按揭行業嗰啲文員。」