22歲江嘉敏扮清純學生妹　網民讚：演技自然　

近期播出的TVB劇《親親我好媽》，論盡怪獸家長，被唔少人讚夠晒貼地。劇中扮演中六學生妹的新演員江嘉敏（Kaman）與江美儀做母女，受到網民熱論，讚佢「演技自然」、「幾純幾甜」、「有感染力」。 22歲的Kaman有「小章子怡」的封號，早於17歲就主演鮮浪潮得獎微電影《野犬與貓咪》，直至2014年，Kaman主演麥曦茵執導的《曖昧不明關係研究學會》，正式以演員身分出道，之後又參演過電影《此情此刻》。未喺TVB露面前，Kaman仲有演出過唔少港台劇，拍MV拍廣告。另外，「清純女神」Kaman亦不時開心些牙整甜品及運動的靚相，有外型又有內涵，自然冇得輸。 學生妹形象入屋，勝在Kaman笑得甜又夠嫩口，不過「女神唔易做」，外型討好的Kaman都受過苦。Kaman生於小康之家，中學讀名校，鋼琴達演奏級，學過結他、打鼓、歌唱及跳舞。中學時期已做Model接私影的Kaman，曾自爆被同學仔揶揄貪慕虛榮，更一度壓力太大想自殺，加上屋企人唔支持Model事業，搞到自己收收埋埋。幸得好友開解，Kaman才走出陰霾，直至依家拍TVB劇，開始入屋受人關注。