《世界零距離III》出街　方東昇新金句夠啜核

《世界零距離》系列由新聞主播方東昇、黃曉瑩、陳沛珈，除了3位主播走訪偏遠、少人認識的地方成為節目賣點外，大家都知方東昇的生鬼主持手法，以及啜核金句都好評如潮。 回顧上輯方東昇為企鵝改名「 Please be seated 請坐」、「海龜外殼色澤鮮艷為之靚龜，今次我就抱得美人『龜』喇」、「You Jump，I Jump，一往情深」等等金句，網民都大讚方東昇有諗頭。 等到頸都長，昨晚《世界零距離III》開波播出第1集，又可以開始統計方東昇的爆肚金句。首集介紹東非的埃塞俄比亞，先探討當地生活水平及飲食文化，3位主播品嚐了當地主要糧食「英吉拉餅」，方東昇皺晒眉頭話：「一試無妨，再試投降」，唔多啱口味。 採訪傳奇長跑選手基比斯拉斯時，方東昇「挑機」鬥跑，又有基比斯拉斯帶去室內玩吓跑步機，跑到上氣不接下氣的方東昇又爆出一句「路遙知馬力 ，啲汗係咁滴」，笑到有腹肌啦！ 睇完首集，網民都期待今晚播出的第2集，因為首集的片尾已經預告定方東昇試用織布機的用後感「織織復織織，織極都唔識」。網民都熱論《世界零距離》夠晒高質，「可以識多啲嘢， 又可以聽爛gag」、「話咁快第三輯，仲記得上年笑佢啲gag」。