祖兒克勤有專人送獎　「7年之癢」C AllStar宣佈暫時分開

正在湛江開騷的容祖兒、李克勤一樣有份拎「勁歌金曲獎」，更有專人送獎到北京。有份唱劇集片頭片尾曲當然有獎分，好似何雁詩、陳展鵬、王浩信，分別憑《愛需要勇氣》《誰可改變》、《不可告人》拎到金曲獎，預咗啦。可能陳展鵬始終係演員拍開劇，比較少唱Live的經驗，聽真啲，佢上台唱得獎歌《誰可改變》唱出CD質素，好似係咪嘴喎！ 「傑出表現獎」由洪卓立、 JW（王灝兒）、 何雁詩、鄭俊弘、陳柏宇、林欣彤共6人奪得，勁有「分豬肉」feel。 組合金銀銅獎分別由C AllStar 、小塵埃 及Super Girls奪得。成軍7年的C AllStar更突然在台上宣佈因「7年之癢」故四子要各自分開抖抖，不過未有講明抖幾耐。