專欄 Will知足球｜一球成名變糖衣毒藥

世界上獨食而好波嘅球員多不勝數，穆斯亞拿、利萊辛尼等等。不過經歷完剛周五晚，發現原來獨食而唔好波亦大有人在，佢就係白禮頓中場祖利奧安施素。

大家都記得佢射入曼城嘅世界波，的確係天外飛仙，不過眨下眼都已經過咗兩季，原來佢顆粒無收，而且出場時間亦都好少，難得佢喺星期五晚主場迎戰賓福特時正選披甲，即刻睇一睇佢嘅發揮。結果安施素簡直就係一粒毒瘤喺白禮頓身上，全場每次一攞到波就獨扭，望到龍門就馬上起腳，唔講以為睇緊漫畫《Blue Lock》，上半場單計佢一個人已經8次起腳，成為今季英超首39分鐘起腳次數最多嘅球員。

去到下半場，領隊靴士拿都頂呢位攻擊中場唔順，戰術上都唔再集中中路組織，改為分兩邊邊路推進。而當安施素走去左邊路攞波時，完全拖慢咗進攻節奏，而且扭到死晒先交，去到78分鐘左右已經自己燒乾自己，最後毫無懸念被調離陣。

一球世界波令到世界上嘅球迷記得佢，但如果表現繼續係咁，就算佢係好後生，都好難再喺英超見到佢。Willhappy