甄濟如自知演戲唔叻想挑戰做MV導演 搭飛機成創作歌曲最佳環境丨獨家

甄濟如（Jasmine）最近推出首支廣東歌《次次》，更邀得剛奪金馬影后的鍾說（鍾雪瑩）填詞。講到平時創作習慣，原來Jasmine覺得搭飛機是最有效創作歌曲的環境。而談到《次次》MV中首次挑戰談情戲，Jasmine大呼跟唱廣東話一樣難應付，更自問不是演戲材料，但對做幕後卻很有興趣，還想有機會挑戰做MV導演。採訪：杜杜 攝影：林賓尼 形象：Cherry Mui&Bullet Films Team髮型：Kayan Lo 化妝：嘉玹.小白

Jasmine自問不是演戲材料，但對幕後工作卻很有興趣。

為了首支廣東歌《次次》錄音，Jasmine花了很多時間做準備。

Jasmine以英文歌出道，因平時都會先以英文創作歌曲，「7歲寫第1首歌都係英文，我有靈感英文係比較快。」她坦言一直沒信心唱廣東歌，苦練多時今次終於夠膽挑戰，「我想出首廣東歌，因為我喺香港長大，出道時未有信心去唱廣東歌，大家都知我廣東話唔係最好，今次決定要做得好。」她直言為《次次》錄音確實很困難，比錄其他歌更花時間，「真係練咗好耐，廣東話唱法同英文唱法好唔同，好多唔同嘅音、咬字，呢首歌比較輕快，我錄音時覺得好似Rap咁，哈哈！」

Jasmine瞓覺前，突然有《次次》的歌曲靈感。

瞓覺前靈感湧現
對於《次次》搵來金馬影后填詞，Jasmine謂一直有留意鍾說的作品，認為她好適合寫這首歌，「鍾說填嘅歌詞係好young同好fresh，呢首歌都係比較young girl嘅style。」《次次》題材講少女情懷、情竇初開，Jasmine強調絕非親身經歷，「我好多歌都鍾意創作個故事，好似《idk》、《TBH》都係我創作嘅故事，除咗《Forever 19》係我真心寫出嚟。」她創作《次次》時，原來是準備瞓覺前，「記得係上年暑假瞓覺前，諗到一句『Before I sleep，I write song about you』，自己諗點樣可以更加romantic，就諗到電話裏面有個emoji，係打鼻鼾有個ZZZ，就諗咗『Before I ZZZ，I write song about you』，再搵鍾說幫我寫廣東嘅version就叫《次次》。」

《次次》MV搵來林愷鈴胞弟林卓毅任男主角，跟Jasmine做對手。

搭飛機不受干擾
談到平日創作歌曲習慣，原來有個環境會令Jasmine有最高效率，「我喺機場或者喺飛機上面寫歌最好，因為冇wifi，可以好專心去諗個ideas。」乘搭飛機不受干擾下創作的作品，上年專輯中都有收錄，「《what the !》都係喺飛機寫，嗰時我18歲。」她通常用鋼琴協助作曲，但亦有例外，「今次《次次》就唔係，真係瞓覺之前哼出嚟，用電話錄起。」由於她7歲已開始作曲，已儲落大批作品，當中有部分寫了一半就放埋一邊，之後才繼續寫，「《次次》就係咁，我係寫咗1年，慢慢才寫完。」不過最經典要算《Forever 19》，「我18歲就嚟19歲時唔想再大個，同朋友講一定要寫首歌叫《Forever 19》，等咗1年都唔知點寫，諗咗好耐寫好teenage感覺定係真心嘅諗法呢？到就快20歲先寫完首歌，所以我生日一定要推出呢首歌，哈哈！」

想不到Jasmine搭飛機時，竟然是最高創作力。

對創作好有興趣的Jasmine，將來有興趣為MV執導。

怕醜難做好演員
Jasmine在《次次》的MV首次挑戰談情戲，她直言覺得比起狂跳舞的MV困難得多，「好多人會問我將來想唔想做演員？我拍完呢個MV更加知我唔係好適合做演員，我比較怕醜，同埋我覺得呢啲愛情故事唔係咁自然，跳舞我係叻啲囉！可能演笑片或者舞台劇好啲，哈哈！」幸好MV搵來林愷鈴胞弟林卓毅（Addison）任男主角，「我同男主角有好多共同嘅朋友，我同佢家姐好friend，佢都係第1次演，我同佢都好green，我覺得都係好事，都好適合呢首歌。」Jasmine未有信心演戲，但早前趁父親節跟胞弟甄濟嘉（James）聯手重新創作，以搞笑手法重現爸爸甄子丹與吳京在《殺破狼》中被譽為「最精彩武打片段」，相當有做幕後天分，她都承認有意執導自己的MV，「我都想試吓，我好鍾意創作，希望可以試吓唔同嘅創作作品。」

Jasmine趁父親節跟胞弟甄濟嘉聯以搞笑手法重現甄子丹與吳京在《殺破狼》中的演出。