政府如何吸引地產商買地？應考慮恢復勾地｜湯文亮

有不少人擔心，地產商唔買地，不但影響香港財政收入，而且到最後，樓價會因土地供應減少而飆升，屆時，政府又可能要重推「辣招」，有乜野辦法令地產商買地？

我認為過去政府所用的賣地方法，最好是先勾地，後拍賣，當土地被勾出，代表已經有人出到價，拍賣只不過錦上添花，但很多人唔明白，這個接近完美賣地政策，最後無疾而終，究竟出了甚麼問題？

勾地政策的確接近完美，但勾地者有可能為他人作嫁衣裳，首先，勾地者手上應該沒有足夠土地儲備，所以才會勾地，但土地被勾出之後，其他地產商就會計數，如果計啱條數，到拍賣時自然會舉手競投。老實說，勾地者能夠拍到土地的機會不大，大多數會由實力雄厚的地產商奪得，做老襯一次就夠，久而久之，冇人會勾地，勾地政策最後無疾而終。

應該恢復勾地政策

我認為政府應該恢復勾地政策，但要加多少優化條件來保護勾地者，當任何人勾出土地而又拍唔到，最後奪得土地的地產商最少要俾1%給勾地者，拍賣價10億就要付1千萬，100億就要付1億。

有了這個條件，測量師就會小心計數，如果計啱條數就會介紹俾地產商，拍到當然冇問題，倘若最後拍賣唔到那幅土地，奪得土地的地產商就要付地價1%給勾地者。

至於點樣分就貴客自理，倘若冇人勾地，政府就要考慮減價，直至有地產商勾地為止，奇怪的就是當土地被勾出拍賣，很有可能又會以高價成交，現在招標賣地的成績很差，既然差就要變。

湯文亮 
紀惠集團副主席及行政總裁

相關文章：

紀惠連環放售酒店及金鐘力寶 湯文亮封筆前曾稱「留現金應付Call Loan」