顏米羔認有「火花」劉威煌唔怕有「小器簿」 男團輕鬆啲小隊開騷考驗團結丨獨家
2024-11-15 08:00 
由《中年好聲音2》衍生嘅男團輕鬆啲(HZD)成員顏米羔、劉威煌、梁浩賢和甘永傑於明晚於麥花臣球場舉行《FUNtas4ic》演唱會。劉威煌坦言4人率先開騷會有壓力；梁浩賢承認男人喺溝通過程較直腸直肚係會有「火花」；顏米羔坦言有火爆位，但甘甘認為能考驗兄弟們默契，今次大家都能順利過關。 採訪：方騫平 攝影：譚志光
8人男團輕鬆啲由「中二生」劉威煌、譚輝智、顏米羔、梁浩賢、甘永傑、梁思傑、潘文龍及王嘉明組成，可惜因為天時、地利、人和，今次只能以4人小隊出擊。梁浩賢解釋：「其實我哋係自由組合，今次純粹打頭陣。」顏米羔認為大家關係好似家人咁，唔使分，反而會互撐；劉威煌承認唔齊人係有美中不足，但強調8人已整裝待發，期望他日能台上合體。不過，仍會要求佢哋入嚟撐場；顏米羔補充：「仲要送埋果籃嚟，入面要有桔，代表大吉大利！」至於甘永傑指，之前4人小組曾做過譚輝智個唱嘉賓，觀眾對FUNtas4ic的演出反而有期待。
翻舊帳屬乸型行為
由於籌備時間唔多，4人都想呈現唔同嘅演出方法，梁浩賢自爆喺溝通過程會火花四濺，凶狠地俾意見：「不過，就算大聲啲堅持己見，4兄弟最後都能搞掂，呢個係我哋合作咗成年嘅優點及默契。」威煌自言男人唔會有「小器簿」；顏米羔和應道：「男人有樣好，睇結果最重要，亦唔得閒搞咁多情緒嘢，唔會咁婆媽，爆完就放下，翻舊帳只係乸型，冇乜意義，當然一定會記得發生過嘅事，因為修正後要互相提點，但小器又係另一回事。」
另外，劉威煌坦言外間曾有質疑聲音，會追問：「4條友仔係咩料呀？喺短時間開騷得唔得㗎？」顏米羔強調：「就算入嚟感受下我哋嘅齊心及團結經已好可貴，值回票價啦。」梁浩賢話，尤其回顧一下這一年輕鬆啲HZD少少嘅里程碑；甘甘認為係一個重要嘅小總結。劉威煌指：「𠵱家我哋好有默契，4合一做好件事。」
最新回應